Porque xulgar ye mui fácil, porque atopar el to sitiu ye menos fácil. A toos y toes los que facéis posible que yo atope, adulces, el mio sitiu.
Ellos dixeron
que yéremos ellos.
Ellos,
los maricones.
Elles,
les muyeres.
Ellos,
los del sado.
Elles,
les del bable.
Ellos,
los comunistes.
Elles,
les antisistema.
Ellos,
los negros.
Elles,
les xitanes.
Ellos,
los probes.
Elles,
les putes.
Ellos.
Elles.
Nós.
Qu'una muyer
ximiendo pela natura,
pegando notra muyer,
cimbrando cola fusta
comete mortal pecáu
al naguar pol cuerpu
y pol placer de so puta.
Que los palillos qu'en mio llingua
faen que babe pola sumisión
son una garantía de condena,
que pensar algamar la redención
al traviés del to llátigu,
que sintir, amás, esto nesti idioma,
ye un absurdu.
Que facelo dende equí,
tan pocu cosmopolita,
que facelo xunta ti,
tan pocu Cosmopolitan,
ye la prueba de qu'allorié.
Y ha ser verdá que toi llocu.
Han tener razón pa matame
y tirar el cadabre nun pozu.
Soilo.
Soi un antisocial,
masoquista y del bable,
antisistema marxinal
y enfermu, ye probable.
Soislo,
dexeneraos,
viciosos,
comunistes,
y, pa enriba, menstruáis.
Ellos,
ellos dixeron
que yéremos ellos.
Y por ello somos nós.
